- 30 -

1455. Juli 25.

In dem Namen Gotis Amen. Czu eynem ewigen gedechtnisse. Wir Bolko von gotis gnaden Herczug zu Oppul vn Obirstenglogaw zc. Bekennen vnd thuen kunth vffuntlichen mit diesim Brieffe vor allen den die In sehen, horm ader lezen, Das vor vns komen vnd gestanden ist Der woltochtige Niclas Loczyna, Erbffoyt zur Kozil. wolgesundt leibes, gutter vornufft, mit Ratte seyner frunde, vnd reicht vff recht vnd redlichen, erplichen vnd ewiclichen, Im namen eynes rechtes und ewicliches erpkawffes. Dem woltochtigen Strolen von Cchechel, vnserm liebin getrawen, seinen geerben elichen nochkomen und nehsten, Die Dorffer vnd gutter Rokycze vnd Wilcze luky, In vnserm Slawenczischim gebitte gelegen, mit allen vnd ytczlichin der selbiger gutter vnd dorffer zugehorungen Ackirn Gearn vnd vngearn, wezen, wezewachs, welden, heyden, puschen. Bruchern, Teichen, teichsteten, Molen, molsteten, fischereyen, wassern, wassirflissen, vnd mit allen andirn vnd yczlichin zugehorungen vnd genissen cleyn ader gros, wie die genant seynt adir genant mochten werden, keynes awsgenomen noch dohynden gelassen, sunder yn aller der mosse vnd weyse als die genanten dorffer vnd gutter yn iren greniczen reyen begryffen vnd von alders an von andirn guttirn vnd dorffern vmbefangen vnd ausgemessen seynt, vnd als sie ouch der genante Niclas Laczina vnd seyne vorfarn gehalden vnd besessen haben, vnd als ouch die alde Brieffe vff die genanten dorffern lawten, vmb Czwe hundertt vnd vmb Czwenczik marg Pregischer groschen vnd Polnischer czal, Die egenanten gutter vnd dorffer Rokycze vnd Wilcze luky Der genante Strol mit seynen erbin elichen nochkomen vnd nehsten mit allen nutchen vnd hirschafften zu haben, zu halden, vorkewffen, vorsetczen, vorwechseln, vorkomern, des zugenissen erblichen vnd ewiclichen zu besitczen vnd domete thuen vnd lossen als sie am allirbekwemlichsten duncken wurde. Des wir Irer beyder dinste vnd bette angesehen haben, vnd haben yn solcher genante reichunge gnadiclichin gegunt, vnd in krafft diesis Brieffis gunen vnd reichen In weysen, Der do mit vnsirm furstlichen Ingesegil versigilt ist. Vnschedlichen vnsern furstlichin dinsten vnd rechten bestetiget, Geschen vnd gegeben zu Obirstenglogaw am freitage des lieben sancti Jacobi des Czwelffboten cristi, Noch cristi geburth firczenhundert vnd In dem fomff vnd fumffczigsten Jare, vnd dobey seint gewest die woltochtigen unser heben getrawen Jan Schilhan von Ottmunth, Conrad Vnyey, Heinrich von der Coye, Mikolay Radawsky, Jan von Zdiechowicz, vnd herre Johannes Lensch von Reynirsdorff vnsir schreiber, dem diesir brieff befolen wart zu schreiben.

Das Siegel in rothem Wachs zeigt den Adler auf einem Helm, und die Umschrift: sigillum ducis. bolkonis de oppol. Rokitsch wurde 1746 vom Stift für 13 000 Th. Schl. erkauft.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 2, Urkunden der Klöster Rauden und Himmelwitz, der Dominicaner und Dominicanerinnen in der Stadt Ratibor. Hrsg von dr. W. Wattenbach, Breslau 1859.